Стоглавъ. Соборъ бывшій въ Москвѣ при Великомъ Государѣ Царѣ и Великомъ Князѣ Иванѣ Васильевичѣ (въ лѣто 7059)
Август 29th 2011 -
Стоглавъ. Соборъ бывшій въ Москвѣ при Великомъ Государѣ Царѣ и Великомъ Князѣ Иванѣ Васильевичѣ (въ лѣто 7059)
ГЛАВА ВОСЕМНАДЦАТАЯ. Отвѣтъ о обручаніи и о вѣнчаніи.
Обручаніе и вѣнчаніе было жъ бы по Божественному уставу, сполна все, во всемъ священническомъ чину, а вѣнчали бы послѣ Обѣдни, а въ ночи бы не вѣнчали, а вѣнчали бы отрока пятнадцать лѣтъ, отроковицу двѣнадцать лѣтъ; а меньши бы отрока пятьнадцать лѣтъ, а отроковицу двѣнадцать лѣтъ не вѣнчали, и потомъ новобрачныхъ поучали отъ Божественнаго писанія, како подобаетъ православнымъ по закону жити.
ГЛАВА ДЕВЯТНАДЦАТАЯ. Чинъ и указъ, аще будеть вдовцу поняти дѣвицу или вдовица за юношу идетъ.
Пришедшимъ симъ по Литургіи въ Церковь, и станутъ на мѣстѣ предъ святыми дверьми, священнику же наченшу во всемъ сану: Благословенъ Богъ нашъ, таже все по порядку вѣнчаніе наимянуетъ, напредь первобрачнаго имя и потомъ двоебрачнаго, или есть мужескій полъ или женскій И по окончаніи всего глаголетъ молитву о двоеженцахъ, аще ли случится и троеженецъ быти единъ отъ нихъ въ той же молитвѣ, пременяя глаголетъ, ко третьему совокупленію, и не глаголетъ браку, понеже нужды ради се бываетъ. Таже отпустъ, ащели есть въ недѣлю глаголется: Воскресе изъ мертвыхъ Христосъ истинный Богъ нашъ молитвами Пречистыя Его Матере, и Святаго егоже есть храмъ, и егоже есть день, и всѣхъ святыхъ, помилуетъ и спасетъ насъ, яко благъ и человѣколюбецъ.
ГЛАВА ДВАДЦАТАЯ. Послѣдованіе ино. — Како подобаетъ и совокупити мужескаго полу и женскаго обоихъ сущихъ во вдовствѣ.
Двоеженецъ и по нуждѣ троеженецъ, взиде ни сіи будутъ въ Церковь, и возложивъ попъ на себѣ эпатрахиль и ѳелонь, тоже глаголетъ: Благословенъ Богъ нашъ. Таже Трисвятое, и по Отче нашъ, священникъ глаголетъ: Яко твое есть царство, также тропарь и кондакъ дню, слава и нынѣ, Богородиченъ; діяконъ: Господу помолимся, священникъ глаголетъ молитву сію.
Господи Боже нашъ, иже Авраама друга назвавъ, и Исаака превозлюбивъ, и Іакова къ женѣ Ліи совокупивъ, и устроивъ того и второму ложу Рахиліину пріобщитися, Самъ нынѣ благослови рабы Своя сія имя-рекъ; освяти же ко второму браку или третьему приходящаго ради естественнаго искушенія, и еже ко юности прилучившагося вдовства, Ты бо хотя немощи нашей, Павломъ сосудомъ избраннымъ Твоимъ законъ положивъ, лучше тѣлеснаго разженія быти о Господе браку немятежну, тѣхъ животъ соблюди и целомудренно тѣмъ пожити даруй, благоволи въ повелѣніихъ Твоихъ идящихъ, не возбраннымъ быти отъ сопряженія союза; яко Твое есть царство и сила и слава, Отца и Сына и Святаго Духа, нынѣ и присно и во вѣки вѣковъ аминь.
Апостолъ среды, семнадцатой недѣли, ко Ефесеомъ посланіе.
Братіе: Мужіе любите своя жены, яко Христосъ возлюби Церковь, и предастся за ню, да освятитъ ю банею водною словомъ, да ю поставитъ себѣ славную Церковь, не имуще скверны, ни клосны, ни инаго таковаго, но да будетъ свята, и непорочна, тако суть должны мужіе любити своя жены, аки своя тѣлеса. Любяй свою жену, себѣ любитъ, никтоже бо никогда своея плоти не ненавидитъ, но кормитъ ю и грѣетъ, якоже и Христосъ Церковь, удове есмы тѣлесе Его, и отъ плоти Его, сего дѣла оставитъ человѣкъ отца и матерь, и прилѣпится къ женѣ своей, и будета въ плоть едину, тайна бо сія велика есть. Азъ же глаголю во Христа и Церковь, обаче и вы по единому, кождо свою жену тако да любитъ.
И по семъ ектенію: Помилуй насъ Боже. Таже поминаетъ Царя и Святителя, и новобрачныхъ; тоже и отпустъ: Христосъ истинный Богъ нашъ, молитвами Пречистыя Его Матере, и Святаго егоже есть храмъ, и Святаго дне, и всѣхъ Святыхъ, помилуетъ и спасетъ насъ, яко благъ и человѣколюбецъ.
ГЛАВА ДВАДЦАТЬ ПЕРВАЯ. О второмъ брацѣ, иже во святыхъ отца нашего Никифора Константина града исповѣдника.
Правило о Церковныхъ его сочиненіихъ, иже съ нимъ Святыхъ Отецъ, правило второе и пятое; двоеженецъ не вѣнчается, но запрещеніе пріемлетъ, не причаститися святыхъ Таинъ два лѣта, тремиженецъ же пять лѣтъ.
ГЛАВА ДВАДЦАТЬ ПЕРВАЯ. О второмъ брацѣ, иже во святыхъ отца нашего Никифора Константина града исповѣдника.
Правило о Церковныхъ его сочиненіихъ, иже съ нимъ Святыхъ Отецъ, правило второе и пятое; двоеженецъ не вѣнчается, но запрещеніе пріемлетъ, не причаститися святыхъ Таинъ два лѣта, тремиженецъ же пять лѣтъ.
ГЛАВА ДВАДЦАТЬ ТРЕТЬЯ. О второмъ же брацѣ, и о троеженцахъ.
А второму браку вѣнчанія нѣтъ, но токмо молитва по правиломъ, третьему подъ запрещеніемъ по священнымъ правиломъ, второму два лѣта епитиміи, аще будетъ младъ, то едино лѣто, а третьему браку пять лѣтъ, общенія и всякія святыни, четвертый бы бракъ отъ васъ никогда же бы именовался. Четвертый бо бракъ законніи правила возбраняютъ; блудяй бо въ себѣ единомъ неправду сію имѣетъ, а иже четвертаго брака яко рекше себѣ смесилъ, поругается убо симъ, возбраняющимъ Божественнымъ священнымъ правиломъ, онъ убо иже разрушаетъ Божественныхъ и свяшенныхъ правилъ, каковое имѣетъ благочестіе, какова отвѣта ждетъ на страшномъ Судѣ. Той убо самъ себѣ отлучай отъ славы Божіей.
Зри.
Богословію же тезоименитіи великіи Григоріи; рекли первый бракъ законъ, вторый прощеніе, третій законопреступленіе, четвертый нечестіе, понеже свинское есть житіе. Премудрый царь Левъ, и ко четвертому браку совокупился бяше, и во отлученіе впаде отъ Николы патріарха, ему же много моляся Царь, еже разрѣшити его отъ таковаго связанія, и якоже Патріархъ не умоленъ пребысть, — Царь отъ Церкви изгна его. И въ его мѣсто паки Евѳимія мужа освященнаго постави на патріаршество и ему Царь много моляшеся, еже разрѣшити его отъ связанія того, и не токмо не разрѣши его, но и отвержена, и не прощена сотвори ради четвертаго брака, со множественнѣйшими Святители возбраняше ему.
ГЛАВА ДВАДЦАТЬ ЧЕТВЕРТАЯ. А о четвертомъ же браку, отреченномъ браку, и о третіемъ.
По великаго же Василія слову, аще мужъ имѣетъ жити съ четвертою женою, или жена за четвертого мужа пойдетъ, тѣхъ Божественная правила, отлучаютъ въ Церковь не входити четыре лѣта, по четвертомъ же лѣтѣ входити въ Церковь, а Божественная причащенія не пріимати до пятьдесять перваго лѣта, ни дары пріимати, ни Богородична хлѣба.
Троеженцы же извергаются, якоже скверніи, къ Церковнымъ даже до пяти лѣтъ не причастнымъ быти повелѣваетъ, и лѣтомъ симъ мимошедшимъ, паки единою въ лѣтѣ ко причащенію Божественному приходити, всечестнаго и спасительнаго дне Пасхи. Въ великій же тотъ постъ, прежде того великаго дне, да очищаютъ себѣ, елико ихъ силы есть. Аще ли духовникъ видитъ того человѣка, запрещеніемъ пекущася о согрѣшеніи томъ, и вельми плачуща и во уныніи ходяща сердечнемъ, причащаетъ паки того на третіе лѣто, причащавшагося и къ третьему браку. Который же свяшенникъ, смѣяй содѣяти паче заповѣданнаго времени таковыхъ Божественнаго причащенія сподобити, той о своемъ степеніи постраждетъ.
Но паче по третьему поима. Аще хощетъ кто совокупитися буде къ женію добрѣ младъ, и дѣтей или не будетъ отъ него, ни отъ перваго брака, ни отъ втораго, тому подобаетъ разсужденіе со епитиміею великою, едваль совокупитися ко третьему браку.
А которые простые люди, имутъ пити до обѣда, и вы такимъ возбраняйте, и просвиры и Богородична хлѣба не давайте, дондеже исправится, да сами бы есте священницы ранняго питія и яденія не въ подобно время, отправивъ правило, ни какоже касались, да не отъ васъ будетъ соблазнъ міру, аще простецъ согрѣшитъ, то единъ о себѣ отвѣтъ даетъ.
А іерей согрѣшитъ, то о мнозѣмъ отвѣтъ бы дати. И вы имать боялися священныхъ правилъ тягости, да не отъ васъ самехъ мнозѣмъ человѣкомъ претыканіе и соблазнъ будетъ, якоже рече писаніе, смущаяй понесетъ, и протчее.
Источникъ: Стоглавъ, Соборъ бывшій въ Москвѣ при Великомъ Государѣ Царѣ и Великомъ Князѣ Иванѣ Васильевичѣ (въ лѣто 7059). — Лондонъ: Trübner & Co., 1860. — С. 58.
